En conxunto as enfermidades transmitidas polos vectores representan un 17% das enfermidades infecciosas. Os principais vectores asociados á transmisión das ditas enfermidades son as carrachas e os mosquitos.

O impacto do clima sobre a presentación dunha enfermidade pódese producir a través da súa influencia na poboación dos vectores, dos hóspedes ou reservatorios, ou directamente no desenvolvemento do patóxeno. Nas últimas décadas detectouse un incremento na incidencia e distribución das enfermidades transmitidas por vectores, feito asociado ao fenómeno de globalización e ao cambio climático, dado que este modifica os patróns de distribución dos vectores responsables da transmisión.

Os cambios na temperatura, nas precipitacións e na humidade afecta o comportamento e a estacionalidade e a abundancia dos vectores, dos hóspedes intermediarios e dos reservatorios naturais e a súa distribución xeográfica.

En Galicia existen vectores infectados polos microorganismos que dan orixe ás enfermidades: leishmaniose, a febre exantémica mediterránea e enfermidade de Lyme.

Tamén hai vectores doutras enfermidades, como a debida ao virus do Nilo Occidental ou á febre hemorráxica de Crimea-Congo, que na actualidade non están a transmitir as ditas enfermidades en Galicia xa que aínda non están infestados cos microorganismos que as producen. Pero esta situación pode mudar se os mosquitos ou as carrachas se infestan e acadan unha densidade suficiente. De feito, xa se detectaron algúns casos en humanos da enfermidade debida ao virus do Nilo Occidental no sur da península Ibérica, e de febre hemorráxica de Crimea-Congo en Castela e León.

Na actualidade na nosa comunidade, están presentes vectores transmisores doutras enfermidades como o dengue, o chikungunya ou o zika, mais non se descarta que nun futuro poidan chegar e instalarse en Galicia, do mesmo xeito que xa fixeron noutras partes da península.

Co fin de controlar a transmisión destas enfermidades, coñecer a densidade, a distribución espazo-temporal e o grao de infestación dos vectores presentes e detectar a chegada e instalación dos que aínda non o están, constituíuse mediante un convenio de colaboración entre as consellerías de Sanidade e de Medio Rural e as universidades de Santiago de Compostela e Vigo, a Rede Galega de Vixilancia de Vectores (ReGaViVec). Na páxina web desta consellería atópase información sobre Enfermedades Transmitidas por vectores.