A
incidencia do contido polínico da atmosfera sobre a saúde humana é
un problema ben coñecido por persoas de todas as idades, que se ven
afectadas de forma importante por diversos síntomas que no seu
conxunto coñécense co nome de polinose.
O
número de persoas afectadas por enfermidades alérxicas causadas
polo pole experimentou un notable incremento, estimándose
actualmente que un 24% da poboación urbana (dos que máis do 40% son
nenos/xoves) sofren reaccións positivas aos test de
hipersensibilidade fronte a algún tipo polínico.
O
pole é un po fino composto polos grans, que son as células sexuais
masculinas das plantas con flores. Estes grans fórmanse no interior
dos estames, nuns recipientes chamados sacos polínicos, e cando
chegan a súa maduración, son liberados, co obxectivo de alcanzar a
célula reprodutora feminina dunha flor da mesma especie, denominada
ovocélula, e fecundala. Nalgunhas especies (plantas autógamas) o
pole pode realizar a súa función na mesma planta que o formou, pero
na maioría das especies (plantas alógamas) o pole só resulta viable se alcanza unha ovocélula doutra planta da súa mesma
especie. O traslado do pole dende o órgano onde se formou ata a
parte feminina da flor coñécese como polinización e pode
efectuarse de diversas maneiras, que son características para cada
especie.
O
proceso de polinización require que os poles sexan células
especialmente resistentes, xa que se ven sometidos a condicións
ambientais adversas que poderían provocar o colapso e desecación
dos compoñentes celulares, alterándoos e facendo o pole inviable.
Por este motivo, os poles están protexidos por unha cuberta chamada
exina, constituída por un dos materiais máis inalterables presentes
na natureza, a esporopelenina, moi resistente a ácidos e bases e aos
cambios de temperatura.
Fonte:
informe técnico para a construción dunha trampa cazapole e un
secador solar de pole
Como
calquera célula, os poles caracterízanse polo seu tamaño e forma.
Pero no caso dos grans de polen, hai características que os
describen, como son a estrutura e escultura (ornamentación) do seu
exina e as aperturas que poden presentar, da que debe observarse o
tipo (poros, colpos, a combinación de ambos ou a súa ausencia), o
número e a disposición na superficie do gran.
A
importancia do control aerobiolóxico
As
sustancias químicas que constitúen o gran de pole poden
desencadear, en persoas susceptibles, síntomas de rexeitamento
manifestados como esbirros frecuentes, lagrimexo, prurito nasal,
moqueira, etc. Isto é unha reacción do propio corpo ante unhas
substancias estrañas que entraron polas vías respiratorias. Cada
individuo reacciona de maneira diferente a esta agresión exterior,
polo que existe unha gran variedade de síntomas, dende a rinite ou a
conxuntivite ata a asma.
É
en primavera cando a maior parte das plantas desenvolven os seus
órganos sexuais, é dicir, as flores, para reproducirse. Sen
embargo, non tódalas plantas polinizan en primavera. Algunhas o fan
practicamente todo o ano, outras o fan basicamente no inverno e
outras en verán e en outono.
Por
estes motivos, dende o punto de vista de Saúde Pública, é moi
importante coñecer os niveis de pole na atmosfera como indicadores
de risco nos doentes alérxicos. Sendo esta información moi útil
tanto para a poboación afectada como para os profesionais sanitarios
implicados no seu diagnóstico e tratamento, porque poderán adoptar
medidas para evitar ao máximo a exposición ao pole e tamén
prescribir o tratamento profiláctico máis acomodado a cada momento.
Ante
esta necesidade de considerar o contido polínico como unha
compoñente importante para a valoración da calidade do aire, xurdiu
a Rede Galega de Aerobioloxía (R.G.A). Este rede botou a andar no
ano 1988, coa formalización do primeiro convenio de colaboración
entre a Universidade de Santiago de Compostela, a Universidade de
Vigo e a Consellería de Medio Ambiente. Dende o ano 2016, conta coa
colaboración da Consellería de Sanidade.
A
Rede Galega
de Aerobioloxía intégrase na Red
Española de Aerobiología (R.E.A.), a cal forma parte da European
Aeroallergen Network (E.A.N.)/European Aeroallergen Network Server-European Pollen
Information (E.A.N.S.-E.P.I.), cuxa finalidade é a de crear un banco
de datos a nivel europeo. As unidades de alerxia e os principais
laboratorios farmacéuticos europeos utilizan esta información para
mellorar e adecuar as baterías de extractos que os médicos
utilizarán na diagnose da alerxia.
Na
actualidade a Rede Galega de Aerobioloxía está composta por cinco
estacións, sitas nas cidades da Coruña, Lugo, Ourense, Santiago de
Compostela e Vigo. Para a localización das estacións activas en
Galicia tivéronse en conta estudos previos feitos na comunidade
galega, que poñen de manifesto que son as cidades do interior as que
recollen maiores concentracións.
Para
a instalación dos captadores nos diferentes puntos de mostraxe de
Galicia, deben cumprise os seguintes requisitos:
- Estar
o aire libre, nun lugar de fácil acceso, protexido e con toma de
corrente asegurada.
- Evitar
o “efecto pantalla” de edificios próximos, que poidesen dificultar ou interromper o fluxo polínico.
- Estar
a unha altura 15-20 metros do chan.
- Localizarse
en lugares representativos de asentamento da poboación, evitando
zonas de polución extrema que puidese afectar as mostras.
A
metodoloxía empregada pola Rede Galega de Aerobioloxía é a
metodoloxía estándar validada pola REA e que é común para toda
Europa. As mostraxes son semanais entre os meses de marzo e xullo.
Recomendacións
sanitarias
En
xeral
- É
importante coñecer os tipos polínicos que lle producen alerxia.
Consulte aos especialistas.
- Coñeza
a época de polinización das especies que lle afectan.
Nos distintos medios de comunicación (internet, prensa, televisión,
etc) pódese consultar a cantidade de grans de pole existente
no ambiente en cada zona xeográfica. Se ten esta información,
coñecerá os momentos de máximo risco nos que debe extremar as
precaucións para evitar padecer un brote alérxico.
- Evite
as exposicións en ambientes exteriores, tanto nos días de maior
concentración de pole, como nas horas do día que rexistran os picos
de concentracións.
- Evite
factores engadidos que poden producir un empeoramento dos síntomas
como fumes e vapores, cheiros fortes, contaminación atmosférica,
cambios bruscos de temperatura, realizar exercicio físico sen
preparación.
- Planifique
as viaxes en épocas e lugares onde non se detecta a presenza de pole
no aire en valores superiores aos limiares de alerxia.
- Lave
con auga abundante o nariz e os ollos para aliviar os efectos da
alerxia. Lave o pelo pola noite para limpalo do pole acumulado
durante o día.
- Seque
a roupa en secadora ou en tendais dentro da casa, xa que na roupa
colgada no exterior pode acumularse o pole. Evite, polo tanto, secar
a roupa ao aire libre.
En
exteriores
- Protexa
os ollos do contacto directo co aire co emprego de lentes que sexan o
mais envolventes posible, reducen a entrada de pole nos ollos e
alivian as irritacións oculares.
- Evite
os parques e xardíns, así como saír ao campo. No caso de saír á
rúa, utilice unha máscara que filtre o aire.
- Non
corte o céspede nin se achegue cando estea acabado de cortar. O
corte do céspede remove o pole. Tampouco debe realizar tarefas de
xardinería.
- Teña
en conta que as concentracións de pole no aire aumentan en días de
tormentas de alto contido eléctrico e ventos fortes.
En
interiores
- En
lugar de varrer ou sacudir o po para limpar a casa utilizaranse
aspiradores e trapos húmidos, polo menos unha vez por semana e en
ausencia da persoa alérxica, se é posible. Aconséllase utilizar
aspiradores especiais para alérxicos, cun elevado poder de retención
de po.
- Pulverice
a casa con auga para limpar o aire do interior de partículas.
- Se
dispón de aire acondicionado é conveniente utilizalo porque ten
filtros que evitan que o pole se manteña no interior da vivenda.
Actualmente hai sistemas de filtración de aire que favorecen o paso
do aire a través duns filtros que reteñen as partículas.
- Evite
peluches, moquetas, alfombras, cortinas, mantas e edredóns de
plumas.
- As
xanelas da casa deben estar pechadas o maior tempo posible, sobre
todo durante o día. Debe procurarse tamén ter as xanelas pechadas
cando vai vento, para previr que entre o pole na casa.
- Permaneza
na casa os días de maior concentración de pole e os días de vento.
Reduza as actividades ao aire libre.
De
viaxe
- Viaxe
no coche coas ventás pechadas.
- Manteña
o interior do vehículo limpo, incluídos os condutos de ventilación.
- Utilice
o
aire acondicionado para filtrar o aire que entra no automóbil e se é
posible instale filtros antipole.
- Evite
viaxar en moto ou bicicleta. O aire, que contén grans de pole,
golpeará con maior forza na cara e pode aumentar a cantidade que
chega ás vías respiratorias. Se se utiliza a moto farase cun casco
pechado.
- Non
se debe conducir se se toman antihistamínicos que provocan o sono. O
grao de somnolencia é alto nos primeiros días do tratamento.